زۆر کەس ساڵانێک بە پرسیاری: من بە سروشتی لە چیدا باشم؟ بەسەردەبەن.
ڕێژوان تەها
هەندێک کەس پێیان وایە بەهرە وەک جادوو دەردەکەوێت. بەڵام لەراستیدا زۆرجار بەهرە و توانای سروشتی لە پشت کردار و بابەتە رۆژانەییەکانمانەوە خۆی شاردۆتەوە و تەنها ئەوەی پێویستە بیبینین و بیناسین، پاشان کاری لەسەربکەین و سەرکەوتووبین تێیدا.
مژدە خۆشەکە ئەوەیە پێویست ناکات بەناوبانگ بیت یان مرۆڤێکی کامڵ بیت بۆ ئەوەی خاڵە بەهێزەکانت بدۆزیتەوە و بزانیت بۆچی باشیت و خودا بۆچی کار و بابەتێک تۆی درووستکردووە. تەنها پێویستت بە ڕاستگۆیی و چاودێری و پلان هەیە.
لێرەدا چەند خاڵێک دەخەمەڕوو بۆ تێگەیشتن لەم بابەتە و ئاسانکاری بۆ دۆزینەوەی بەهرە و تواناکەت، کە بیکەیتە پیشەی ژیانت و رۆژانە هەوڵی بۆبدەیت تا تێیدا سەرکەوتووبیت:
١- هەستکردن بەئارامی و چێژ:
هەندێک شت بۆ کەسانی تر سەخت و ماندووکەرە، بەڵام بۆ تۆ ئاسانە. ئەمەش زۆرجار نیشانەی توانای سروشتییە، کە تۆ دەتوانیت لەم بوار و بابەتە سەرکەوتووبیت.
لە خۆت بپرسە:
*ئایا لەکاتی خەریکبوونی چی بابەتێک من هەست بە ماندوویی ناکەم؟
*لەگەڵ چی بابەتێکدا هەست بەرۆیشتنی کات ناکەم و حەزدەکەم زۆربەی رۆژەکەم خەریکی بم؟
* چی شتێک زووتر و باشتر لە هەموو شتەکانی دی فێریدەبم؟
*لەچی بەباشی تێدەگەم؟
*لەچی بابەتێکدا بیرۆکەی زیاتر و باشترت بۆدێت؟
زۆربەی کات وەڵامی هەموو ئەمانە پێکەوە بەستراوە و دەچێتەوە سەر بابەتێک، یان چەند بابەتێک.
ئەو بابەتەی زۆربەی وەڵامەکان دەیگرێتەوە، ئەو شت و بابەتەیە کەهی تۆیە و تۆ تێیدا سەرکەوتوودەبیت.
٢. سەرنج بدە چی وزەت پێدەبەخشێت:
بەهرە و توانا سرووشتییەکان، ئەوەی کە تۆ بۆی درووستکراویت، وزە نابەن، بەڵکوو وزە دەبەخشن!
دوای ئەنجامدانی ئەو بابەتەی هەڵتبژاردووە پرسیار بکە:
* ئایا هەست بە ژیانەوە و خۆشی دەکەم؟
* ئایا کات زوو تێپەڕی؟
* ئایا دەمەوێت دووبارە بیکەمەوە؟
وزە ئاماژەیە! هەر شتێک گڕوتین و وزەت بداتێ، مانای وایە ئەو شتە لەگەڵ سرووشت و کەسایەتی تۆ دەگوجێت.
٣. گەڕانەوە بۆ منداڵی:
پێش ترس و فشار، مرۆڤەکان بە سروشتی خۆیان بەرەو خاڵە بەهێزەکانیان و بەهرە و توانا سرووشتییەکانیان دەجووڵان.
بیر لەوە بکەرەوە:
* لە منداڵیدا چیت خۆشدەویست؟
٭ بێ ئەوەی لێت بپرسن و پێت بڵێن چیت کرد؟
* چی وای لێکردی بۆ چەند کاتژمێرێک سەرقاڵبیت؟
منداڵی ئاماژە بەجێدەهێڵێت، منداڵێک لە وەرزش، یەکێک لە گۆرانی وتن یاخود موزیک، یەکێکی دی لە دروستکردن و بونیادنان، یەکێک لەوێنەکێشان، یەکێک لە مامۆستابوون، یەکێکی دیکەش لە نمایش و ئەکتینگ…
تۆ بە منداڵی سەرقاڵی چی بوویت و مەستانە قووڵدەبوویتەوە تێیدا، ئەمە مانای وایە ئەو بابەتە لەگەڵ کەسایەتی تۆ دەگونجێت.
٤. چەند تاقیکردنەوەیەک:
بەهرە لە ڕێگەی کردارەوە دەدۆزرێتەوە نەک تەنها بیرکردنەوە.
ئەمانە تاقی بکەرەوە، ئەگەر لەبەرامبەر کامێرای مۆبایلەکەت بێت، یاخود هەفتەیەک دانێیت بۆ خوێندنەوە و پراکتیزەکردنیان:
* نووسین
* وانەوتنەوە
* موزیک
* بزنس
* ديزاين
* زمانەکان
* سەرکردایەتی و بەڕێوەبردن
* وەرزش
*هەر شتێکی دیکە کە حەزی پێدەکەیت….
بۆ هەریەکەیان هەوڵی ڕاستەقینە بدە، چونکە ئەزموون ڕاستییەکان ئاشکرا دەکات!
لەگەڵ هەر کامیان هەستتکرد خاڵەکانی پێشووت تێدا دەردەکەون و هەست بەباشی دەکەیت، هەڵیبژێرە و هەر لەمڕۆوە ژیان لەگەڵ بەهرە و توانا سرووشتییەکەت دەستپێبکە.
٥. بەهرە و دیسیپلین:
بەهرە بەبێ راهێنان و کار بە شاراوەیی دەمێنێتەوە و گەشەناکات. تەنانەت دیارییە سروشتییەکانیش پێویستیان بە ڕاهێنان و دووبارەکردنەوە و ئارامگری هەیە.
کەسێک کە بەهرەیەکی ئاسایی و دیسیپلینێکی بەهێزی هەبێت، زۆرجار لەکەسێک کە بەهرەیەکی گەورەی هەبێت لەو شتەدا باشتردەبێت و سەرکەوتووتر دەبێت. راهێنان و قووڵبوونەوە بنەما و بناغەی سەرکەوتن و گەشەکردنە لەهەر بوارێکدا!
لەوانەیە لەیەک بەهرە زیاتر بدۆزیتەوە. زۆر کەس بەهرەیەک زیاتریان هەیە و دەکرێت سەرکەوتووبن لە چەند شتێکدا.
بەڵام بە گشتی مرۆڤ هەوڵبدات سەرنجەکانی تەنها لەسەر بابەتێک چڕبکاتەوە و زۆربەی کاتەکانی لەگەڵ یەک بابەتدا بەسەربەرێت، گەلێک باشتر و چاکترە بۆی.
بە خێراییەکی زیاتر و کوالێتییەکی باشتر سەرکەوتوودەبێت.
ڕەنگە تۆ بە سروشتی باشبیت لە:
* پەیوەندییەکان + موزیک
* سەرکردایەتی + مامۆستایی
* وتاربێژی + وێنەکێشان
* ئەکتینگ + نووسین..
