رێژوان تەها
ڕەنگە دژیەک دەرکەوێت، بۆچی کەسێک کە بەهێزە، خۆڕاگرە یان لە ڕووی سۆزدارییەوە جێگیرە.. گوێ لە موزیکی خەمناک دەگرێت؟ چی وادەکات کەسێک خوازیاری گۆرانییەکی خەمناک بێت؟ لێکۆڵینەوەکانی دەروونناسی و موزیک، پاشان لێکۆڵینەوەکان لە مرۆڤ پەیوەندییەکی قووڵتر لە نێوان مرۆڤ و موزیکی خەمناک ئاشکرادەکەن، لێرەدا چەند سەرنجێک دەخەمەڕوو:
موزیکی خەمناک هۆشیاری سۆزداری قووڵتر دەکاتەوە
زۆرجار تاکە بەهێز و جێگیرەکان خودئاگاییان بەرزە. گوێگرتن لە موزیکی خەمناک ڕێگەیان پێدەدات بەدواداچوون بۆ هەست و سۆزە ورد و شاراوەکانیان بکەن و قووڵتر ببنەوە لەخۆیاندا؛ بیر لە ئەزموونەکانی ڕابردوو بکەنەوە و لە چوارچێوەی تەواوی هەستەکانیان تێبگەن. ئاوازە خەمناکەکان فەزای گونجاو دەڕەخسێنن بۆ ڕووبەڕووبوونەوەی خەم، یادگاری و شکستەکان.. بەبێ زاڵبوونیان بەسەر گوێگرەکەدا.
ئازادکردنی هەستەکان و ڕێکخستنی بیرەکان
موزیکی خەمناک دەتوانێت وەک ئامرازێکی گرنگ کار بکات. تەنانەت کەسانی خۆڕاگر و بەهێزیش پێویستیان بە دەرچەیەک هەیە بۆ ئازادکردنی گرژییەکان و ڕێکخستنەوەی هەستەکانیان. گۆرانی لەوجۆرە دەتوانێت فرمێسک لەچاوەکان بڕژێنێت و هەستە کپکراوەکان دەرببڕێ؛ هەست و خەیاڵی کپکراو و کۆنتڕۆڵکراو ئازاد دەکات، ئەمەش هاوسەنگی و تەندرووستی دەروونی بەهێز دەکات، نەک لاوازی بکات.
،ئەو کەسانەی کە لە ڕووی سۆزدارییەوە بەهێزن دەتوانن گوێ لە خەم و پەژارەکان بگرن، بەبێ ئەوەی بەهۆیەوە تێکبشکێن. لە ڕووی هزری و تێڕامانەوە هەست بە ئازارە دەروونییەکان و خەمۆکی دەکەن، چێژ لە جوانییەکانی خەم و پەژارە وەردەگرن، بەبێ ئەوەی بکەونە ناو نائومێدییەوە. موزیکی خەمناک دەبێتە فۆرمێکی هونەری بۆ تێڕامان و تێگەیشتن، نەک تەنها هاندەر و گەشەپێدەری ئازارەکانبێت.
پەیوەندی بە مرۆڤبوون و هاوخەمی
زۆرجار موزیکی خەمناک: گوزارشتی ململانێ، دڵشکاندن یان ڕەنگدانەوەی وجودی دەگەیەنێت. ڕەنگە تاکە بەهێز و جێگیرەکان گوێی لێبگرن، چونکە دەیانبەستێتەوە بە ئەزموونی مرۆڤەوە، بیریان دەخاتەوە کە ئازار سروشتییە و ڕاگوزەر و هاوبەشە بۆ هەمووان. ئەمەش هاوخەمی و تێگەیشتن بەهێز دەکات.
سەرچاوەیەک بۆ بیرکردنەوە
موزیکی خەمناک دەتوانێت ببێتە هۆی داهێنان و تێڕوانین و گەشەکردنی کەسی. زۆرجار گوێگرانی لەوجۆرە بەدوای مانادا دەگەڕێن، نەک تەنها خۆیان سەرقاڵبکەن. گۆرانییە خەمناکەکان دەتوانن ئیلهامبەخش بن بۆ بیرکردنەوە لە ئاستەنگەکانی ژیان، پاڵنەر بن بۆ باشترکردنی کەسی یان ڕێگاکانی پێشەوە ڕووناک بکەنەوە.
لە کۆتاییدا، خەم و پەژارە لە موزیکدا زۆرجار جوانە. کەسانی جێگیر و ئاساییش دەتوانن لە هونەری خەم و دەقی شیعری عاشقانە، ئاوازە خەمناکەکان، بابەتە جیاوازەکانی لەوجۆرە درک بکەن.
گوێگرتن لە موزیکی خەمناک نیشانەی لاوازی نییە!دەتوانێت نیشانەی زیرەکی هەستەکی و خودئاگایی و هێز بێت. یاخود چێژێکی تایبەت و جیاوازبێت بۆ ئەو کەسانەی حەز بەم جۆرە لەموزیک دەکەن. مرۆڤە بەهێزەکان خەم و ئازار لە باوەش دەگرن، دەزانن بەشێکە لە بوونی هەموو مرۆڤێک. مرۆڤەکان دەتوانن قووڵتر لە هەستەکانیان ڕۆبچن و لێیان تێبگەن و پاشان ئازادیان بکەن؛ لە جیهانێکدا کە پڕی خەم و خۆشی، ترس و ئازایەتی، شکست و هەستانەوە، کەوتن و سەرکەوتنە.
