نووسینی: حەسەن فەلاح
لە سەردەمی دانانی موزیک و ئەنجامدانی کاری هونەرییدا، ئەنتۆنیۆ سالێری یەکێک بووە لە دیارترین موزیکدانەرانی ڤیەننا و بە هێندی مۆزارت لەناو خەڵکدا ناوبانگی هەبووە.
سالێری رێکەوتی 18ـی ئابی 1750 لە ئیتاڵیا لەدایکبووە، وانەبێژ و مامۆستایەکی ناسراو بووە، چەندین موزیکدانەری بەناوبانگ لەسەر دەستی موزیکیان خوێندووە، لەوانە: بیتهۆڤن، شوبێرت، لیست و چزێرنی.
یەکێک لە باوترین بیرۆکەکان سەبارەت بە بوونی ململانێیەکی قووڵ لەنێوان سالێری و مۆزارتدا، لە سایەی ئیرەیی سالێری دێت بۆ توانا و بەهرەکانی مۆزارت، راستیی ئەم دۆخەش لەکاتێکدا بووە، لە ئاستی پیشەییدا کەمێک گرژیی لەنێوانیاندا هەبووە و رکابەرییەکی سەختی پیشەییان هەبووە، بەڵام هیچ بەڵگەیەک بوونی نییە کە دژایەتیی راستەوخۆی ئەم دوو کەسایەتییە بخاتە روو.
سالێری بە چەند زمانێکی جیاواز موزیکی داناوە، لەوانە: ئیتاڵی، فەڕەنسی و ئەڵمانی، هەر ئەمەش وای کردووە، بتوانێت بە چەند شێوازێکی جیاواز موزیک دابنێت و تایبەتمەندیان بکات بە وڵات و جەماوەری جیاوازەوە.
لە کۆتا ساتەکانی ژیانیدا، سالێری لە نەخۆشخانەی دەروونیی کاتەکانی بەسەربردووە و دووچاری لەبیرچوونەوە بووە، بەشێک لە دەنگۆ و قسەڵۆکەکانیش ئاماژە بەوە دەدەن؛ سالێری بەهۆی دانپێدانانی هەوڵی لەناوبردنی مۆزارت دەروونی ماندوو بووە، بەڵام هیچ بەڵگەیەک لەسەر ئەم دەنگۆیەش بوونی نییە.
سالێری رێکەوتی حەوتی ئایاری 1825 لە تەمەنی 74 ساڵییدا کۆچی دوایی کردووە.
لەماوەی ژیانی هونەریی خۆیدا، زیاتر لە 90 پارچەی موزیکیی داناوە، لە گرنگترینیان ئەو 39 ئۆپێرایەن کە لەلایەن زۆرینەوە ستایش دەکرێن.
